Aleksandr Sokurov heiðursgestur

09-09-06 15:29
Rússneski kvikmyndaleikstjórinn Aleksandr Sokurov verður heiðursgestur Alþjóðlegrar kvikmyndahátíðar í Reykjavík. Honum verða veitt sérstök heiðursverðlaun fyrir framlag sitt til kvikmyndalistarinnar við hátíðlega athöfn.Sokurov er einn fremsti kvikmyndaleikstjóri samtímans og hefur á ferlinum sópað að sér verðlaunum á virtustu kvikmyndahátíðum í heimi, t.a.m. í Cannes, Berlín, Toronto, Locarno og á evrópsku kvikmyndaverðlaununum. Þá var hann hátt skrifaður á áhrifaríkum lista Guardian yfir 30 bestu núlifandi kvikmyndaleikstjóra í heimimum. Sokurov hefur m.a. verið líkt við Andrey Tarkovsky, Werner Herzog og Ingmar Bergman.

Sokurov mun einnig standa að masterklassa í hátíðarsal Háskóla Íslands laugardaginn 7. október. Hann hefur verið í fararbroddi á sviði stafrænnar kvikmyndagerðar og mun m.a. fjalla um kvikmyndir frá stafrænu sjónarhorni.

Tvær mynda Sokurovs verða sýndar á meðan á hátiðinni stendur, Russian Ark (Russkiy kovcheg) frá 2002 og The Sun (Solntse) frá 2005.