Barátta í eina mínútu

Alþjóðleg kvikmyndahátíð í Reykjavík, RIFF, mun eins og undanfarin ár standa fyrir einnar mínútu örmyndasamkeppni í samstarfi við Loft Hostel. Þemað að þessu sinni er BARÁTTA með vísun í kvenna-BARÁTTU og umhverfis-BARÁTTU. Skilyrði er að myndin sé akkúrat ein mínúta að lengd.

RIFF er líkt og undanfarin ár í samstarfi við hollensku kvikmyndasamtökin The One Minutes. Samtökin hafa framleitt og dreift meira en þúsund einnar mínútu myndum eftir fólk af 120 þjóðernum og mun RIFF sýna einnar mínútu myndir frá þeim víðsvegar um Reykjavík og Kópavog á hátíðinni í haust.

Í bæði skiptin sem keppnin hefur verið haldin hefur þátttaka verið geysigóð og upprennandi kvikmyndagerðarfólk sent inn verk sín í hrönnum. Þær innsendu myndir sem dómnefnd telur bestar verða frumsýndar á verðlaunafhendingu á Loft Hostel þann 26. september næstkomandi. Þá verður myndin sem hreppir fyrsta sætið sérstaklega verðlaunuð. Bestu myndirnar verða sýndar á Loft Hostel yfir hátíð.

Frestur til að senda inn myndir hefur verið framlengdur til 19. september. Til að öðlast þáttökurétt er nægilegt að senda youtube eða vimeo hlekk með myndinni og lykilorði á netfangið einminuta@riff.is. Einnig skal fylgja nafn þess sem gerir myndina og aldur.

Fyrri sigurvegarar:

2013
Erlendur Sveinsson fyrir myndina Breathe (þema: „Loft“)

2014:
Logi Leó Gunnarsson fyrir myndina Hringur (þema: „Deep Blue“)

 

Meira hér: https://www.facebook.com/events/521750581328180/