David Cronenberg heiðursgestur RIFF 2015

Kanadíski leikstjórinn David Cronenberg verður heiðursgestur á Alþjóðlegri kvikmyndahátíð í Reykjavík, RIFF, í ár. Hátíðin fer fram dagana 24. september til 4. október.

David Cronenberg mun taka á móti heiðursverðlaunum hátíðarinnar fyrir æviframlag sitt til kvikmyndalistarinnar. Hann verður gestur á Bransadögum RIFF, verður með meistaraspjall sem er opið öllum, verður með meistaraspjall fyrir upprennandi kvikmyndagerðarmenn í Reykjavík Talent Lab og valdar myndir verða sýndar eftir hann á hátíðinni.

Cronenberg er einn fremsti kvikmyndaleikstjóri samtímans og hefur hlotið verðlaun á helstu kvikmyndahátíðum í heimi, svo sem dómaraverðlaun í Cannes og Silfurbjörninn í Berlín. Árið 2006 hlaut hann heiðursverðlaunin Carrosse d’O fyrir æviframlag sitt til kvikmyndalistarinnar á kvikmyndahátíðinni í Cannes.

Hann er hrollvekjumeistari sem hefur verið nefndur konungur líkamlegs hryllings eða barón blóðsins. Kvikmyndir hans ögra, fara gegn hefðbundnum frásagnarstíl og fara iðulega undir skinnið á áhorfendur. Þær fjalla oft á myrkan hátt um eðli mannsins og er líkaminn algengt umfjöllunarefni.

Á meðal kvikmynda eftir hann eru Rabid, Videodrome, Dead Ringers, Crash, Naked Lunch, A History of Violence og Eastern Promises. Ein þekktasta kvikmynd hans er The Fly frá árinu 1986 með Jeff Goldblum í ógleymanlegu hlutverki vísindamanns sem breytist í flugu.

Nýjasta kvikmynd Cronenbergs, Maps to the Stars, var frumsýnd á kvikmyndahátíðinni í Cannes í fyrra og skartar þeim Julianne Moore, Mia Wasikowska, John Cusack og Robert Pattinson. Um er að ræða fyrstu kvikmyndina sem Cronenberg, 72 ára að aldri, tekur upp í Bandaríkjunum.