Ókeypis námskeið í eftirvinnslu

24-08-06 16:55
Apple IMC á Íslandi býður upp á ókeypis námskeið í eftirvinnslu á iMovie hugbúnaðinn á laugardögum í ágúst og fram til 9. september. Næsta námskeið fer fram í höfuðstöðvum Apple að Laugavegi 182 laugardaginn 26. ágúst.Fyrsta námskeiðið fór fram síðustu helgi og heppnaðist vel. Námskeiðin eru kjörið tækifæri til þess að koma skipulagi á heimamyndböndin eða til þess að stíga fyrstu skrefin inn í heim kvikmyndanna.

Námskeiðin eru haldin í tengslum við samkeppni Alþjóðlegrar kvikmyndahátíðar í Reykjavík um bestu heimagerðu heimildarmyndina, en skil á mynd í keppnina eru 15. september.

Til upprifjunar fylgja hér reglur keppninnar með:

• Umfjöllunarefni eða yfirskrift myndarinnar skal vera „fjölskyldan mín.“ Fólki er í sjálfsvald sett hvernig efnistökum er háttað.
• Myndin skal ekki vera lengri en tíu mínútur.
• Myndin skal klippt með iMovie hugbúnaðinum frá Apple. Hafi fólk ekki aðgang að hugbúnaðinum býðst því aðstaða til eftirvinnslu hjá Apple IMC á Íslandi.
• Myndum skal skilað á DVD-diski fyrir 15. september nk.

Dómefnd skipuð Ilmi Kristjánsdóttur leikkonu (Stelpurnar), Árna Ólafi Ásgeirssyni leikstjóra (Blóðbönd) og Bjarka Guðjónssyni, fulltrúa Apple IMC, mun velja bestu myndirnar. Þær verða síðan sýndar á fjölskyldudegi kvikmyndahátíðarinnar, 8. október. Ein myndanna hlýtur verðlaun sem besta heimagerða heimildarmyndin. Í verðlaun er MacBook fartölva frá Apple.

Myndunum skal skilað í lokuðu umslagi til:

Alþjóðleg kvikmyndahátíð í Reykjavík
„Fjölskyldudagur“
Kirkjutorgi 4
101 Reykjavík