Miðasalan er hafin á RIFF (Alþjóðleg kvikmyndahátíð í Reykjavík) sem hefst þann 28. september n.k. og mun standa til 8. október í Háskólabíói. Þetta var tilkynnt á blaðamannafundi sem haldin var þann 18. september á Hagatorgi við Háskólabíó. Opnunarmyndin er Tilverur, frumraun Ninnu Pálmadóttur og lokamyndin er Poor Things eftir Yorgos Lanthimos sem hlaut Gullna ljónið í Feneyjum fyrr í mánuðinum.
Fagnað verður 20. útgáfunni af RIFF! Sýndar verða yfir 80 kvikmyndir í fullri lengd auk fjölda stuttmynda frá alls 63 löndum. Fjöldi Norðurlandafrumsýninga er á RIFF og margar myndanna koma hingað frá virtustu hátíðum í heimi s.s. Cannes, Feneyjum, Toronto og Rotterdam. Því er um að ræða einstakt tækifæri til að sjá bestu myndir ársins en flestar myndanna verða ekki sýndar áfram í bíói hérlendis!
Sýningar í þessa ellefu daga fara fram í Háskólabíói sem er aðalsýningarstaður RIFF, en jafnframt í Norræna húsinu og í Slippbíói. Auk þess verður kvikmyndadagskrá RIFF út um alla borg – í litlum verslunum, bókasöfnum, gróðurhúsinu Lækjartorgi, hvalaskoðunarbáti og hótelum – undir nafninu RIFF um um bæinn. Þá teygir verkefnið RIFF um landið sig út um allt Ísland.
Myndirnar eiga það sammerkt að endurspegla það besta sem alþjóðleg kvikmyndagerð hefur uppá að bjóða. Um er að ræða nýjar gæðamyndir af ýmsu tagi eftir vel þekkta leikstjóra á borð við Luca Guardagnino, Wim Wenders, Werner Herzog, Catherine Breillat, Angelu Schanelec og Yorgos Lanthimos yfir í framsæknar kvikmyndir eftir nýja leikstjóra sem keppa um Gullna lundann. Sannkölluð meistaraverk þar sem oft eru farnar nýjar leiðir í kvikmyndalistinni.
Fjöldamargir spennandi titlar
Meðal mynda sem RIFF sýnir í ár er finnska gamanmyndin, FAMILY TIME sem er frumraun Tia Kouvo sem sló í gegn á Berlínale fyrr á árinu. SWEET EAST eftir Sean Price Williams sem sópað hefur að sér verðlaunum frá því hún var frumsýnd í Cannes sl. vor, BAAN eftir Leonor Teles sem frumsýnd var við frábærar undirtektir í Locarno í sumar, MAY DECEMBER eftir Todd Haynes og Natalie Portman, The Taste of Things eftir Anh Hung Tran með Juliette Binoche í aðalhlutverki, ANTARCTICA CALLING eftir heiðursgest okkar Luc Jacquet sem frumsýnd var á hinni virtu kvikmyndahátíð í Rotterdam nýlega, ON THE ADAMANT eftir Nicolas Philibert sem hlaut Gullbjörninn í Berlín, ORLANDO My Political Biography eftir Paul B. Preciado, LA BETE eftir Bertrand Bonelle með Léa Seydoux í aðalhlutverki en myndin hlaut lofsverða dómi á frumsýningu í Feneyjum fyrr í mánuðinum, L’ETE DERNIER eftir Catherine Breillat, THEATER OF THOUGHT eftir Werner Herzog, ANSELM eftir Wim Wenders, WHAT REMAINS eftir Ran Huang með Gustaf og Stellan Skarsgård í aðalhlutverkum og SIDONIE IN JAPAN eftir Élise Girard með Isabelle Huppert í aðalhlutverki en myndin sló í gegn í Feneyjum fyrr í mánuðinum þar sem hún var heimsfrumsýnd.
Í tilefni 20. hátíðarinnar verða þær íslensku stuttmyndir sem hafa hlotið verðlaun á RIFF í gegnum árin sýndar og fram fer vegleg ljósmyndasýning úr sögu RIFF í Norræna húsinu, á stöplum í Pósthússtræti auk þess sem Háskólabíói verður breytt í allsherjar menningarmiðstöð með listsýningum, sælkeraveitingum fyrir svanga og þyrsta og huggulegri bíóstemningu. Keppni fer fram um hver sér flestar myndir á RIFF og verður viðkomandi boðið í veglegt lokahóf hátíðarinnar þann 7. október.
Miðasala á stakar sýningar er hafin og RIFF appið er komið í gagnið. Seld eru afsláttarkort þar sem stakur miði kostar um 1400 krónur ef keypt er 8 miða kort og passinn gildir á allar myndir. Hátíðarpassinn er á 20% afslætti fyrir nemendur, öryrkja og eldri borgara.
Frakkland í fókus
Frönsk kvikmyndagerð er í brennidepli á RIFF þetta árið og bjóðum við áhorfendum því upp á rjómann af fjölbreyttum og áhugaverðum frönskum kvikmyndum og stuttmyndum samtímans.
Frakkland státar af einum elsta og stærsta kvikmyndaiðnaði í heimi. Saga franskra kvikmynda er nátengd sögu kvikmyndalistarinnar sjálfrar enda voru það franskir bræður, Auguste og Louis Lumière, sem héldu fyrstu kvikmyndasýningu heims í París árið 1895. Allar götur síðan hafa Frakkar verið í fararbroddi í þróun kvikmynda og eiga þeir marga heimsþekkta kvikmyndalistamenn á borð við Georges Méliès, Jean-Luc Godard, François Truffaut, Agnès Varda, Brigitte Bardot og Gérard Depardieu svo örfá nöfn séu nefnd. RIFF 2023 sýnir yfir 30 myndi í fullri lengd frá Frakklandi þetta árið
RIFF tölfræði
-
- Þetta árið fer RIFF fram í tuttugasta skiptið og mun hátíðin í heild sýna 248 kvikmyndaverk.
- Þar af eru 87 myndir í fullri lengd og 161 stuttmynd.
- 113 myndir eru eftir konur en 130 myndir eru eftir karlmenn.
- RIFF sýnir myndir frá 63 mismunandi löndum á borð við:
- Íslandi, Slóvakíu, Bretlandi, Írlandi, Bandaríkjunum, Finnlandi, Svíþjóð, Chile, Frakklandi, Danmörku, Spáni, Víetnam, Singapúr, Litháen, Ísrael, Portúgal, Þýskalandi, Argentínu, Mexíkó, Serbíu, Rúmeníu, Króatíu, Austurríki, Grikklandi og mörgum fleirum.
- Það land sem er með flestar myndir á hátíðinni er Frakkland en 30 myndir í fullri lengd verða sýndar þaðan enda er Frakkland í fókus.
Verðlaunaðar kvikmyndir
- Fjöldamargar kvikmyndir sem nú þegar hafa unnið til alþjóðlegra verðlauna verða til sýningar á RIFF 2023. Hér eru nokkur dæmi.
- Inside the Yellow Cocoon Shell eftir Thien An Pham – Camera d’Or sigurvegari fyrir bestu mynd á Cannes.
- The Settlers eftir Felipe Gálvez – FIPRESCI verðlaunin
- The Taste of Things eftir Tran Anh Hùng – Besti leikstjórinn á Cannes
- Orlando, My Political Biography eftir Paul B. Preciado – Berlinale Encounters: sérstök dómnefndarverðlaun
- The Klezmer Project by Leandro Koch, Paloma Schachmann – Besta fyrsta mynd í flokki heimildarmynda á GWFF
Verðlaun á RIFF 2023
Keppnisflokkur mynda á RIFF kallast Vitranir (New Visions) þar sem átta myndir eftir nýja og upprennandi leikstjóra (fyrsta eða annað verk) keppa um aðalverðlaun hátíðarinnar sem er Gullni Lundinn. Verðlaunin hafa verið veitt síðan 2005 en með þeim vill RIFF styðja við unga og efnilega leikstjóra.
Græni Lundinn: Eru umhverfisverðlaun sem veitt eru þeim sem hafa með vinnu sinni stutt að náttúruvernd í gegnum kvikmyndagerð. Viðtakandi Græna Lundans í ár er Luc Jacquet.
Stuttmyndakeppni RIFF 2023: RIFF heldur árlega samkeppni íslenskra stuttmynda og munu RÚV og Trickshot veita verðlaun fyrir bestu myndina. Sýningar á myndunum fara fram í tveimur hlutum og horft er á hvorn þeirra í heilu lagi. Sýningar munu fara fram í Háskólabíó þann 30. september á fyrri hlutanum og 1. október á þeim seinni.
Heiðursverðlaun: verða veitt á RIFF þeim heiðursgestum sem koma til Íslands vegna hátíðarinnar. Forseti Íslands Guðni Th. Jóhannesson mun veita verðlaunin á Bessastöðum fyrir hönd RIFF.
Sérviðburðir
- RIFF stendur fyrir margskonar sérviðburðum á hverju ári og er engin undantekning á því nú. Boðið verður meðal annars upp á jöklabíó í ísgöngunum á Langjökli en það mun fara fram þann 4. október. Sýnd verður heimildarmynd Lars H. Ostenfeld Into the Ice.
- Þá verður einnig hægt að fara í hellabíó í Raufarhólshelli sem mun fara fram þann 30. september með sýningum á bæði teiknimyndinni Scarygirl frá 2023 og hrollvekjunni Arachnophobia frá árinu 1990.
- Fyrir þá sem vilja aðeins rólegri og þægilegri stemningu verður hægt að upplifa sjónræna matarveislu í Norræna Húsinu þar sem Sónó matseljur munu elda gómsæta rétti í tengslum við sýningu teiknimyndarinnar Ratatouille (30.09 og 01.10).
- „Sorgarstig“ lifandi tónleikar (4. október): Á þessum einstaka tónlistarviðburði mun munnhörpuleikarinn Þorleifur Gaukur Davíðsson koma fram ásamt píanóleikaranum Davíð Þór Jónssyni og gítarleikaranum Skúla Sverrissyni og flytja tónlist innblásna af stuttmyndinni Sorgarstig. Tónlistarmyndin Sorgarstig fjallar um hóp hæfileikaríkra tónlistarmanna sem koma saman í kjölfar föðurmissis í yfirgefinni rafstöð og veita tilfinningunum útrás í lifandi spuna.
Flokkar RIFF 2023
- Vitranir / New Visions
- Fyrir opnu hafi / Open Seas
- Önnur framtíð / A Different Tomorrow
- Heimildarmyndir / Documentaries
- Tónlistarmyndir / Cinema Beats
- Sjö sniðugar / Smart7
- Frakkland í fókus / France in Focus
- Meistarar og heiðursgestir / Masters and Honorary Guests
- Ísland í sjónarrönd / Icelandic Panorama
- Íslenskar verðlaunamyndir í gegnum árin / Icelandic Winner’s Through the Years
- Myndir úr norðri / Films From the North
- Teiknimyndir frá Lettlandi / Latvian Animation
- Miðnæturtryllar / Midnight Thrills
- Alþjóðlegar stuttmyndir / International Shorts
Dynjandi lófatak
RIFF væri ekki til nema fyrir stuðning menningarmálaráðuneytis, Reykjavíkurborgar og Creative Europe auk mikilvægs framlags fyrirtækja og stofnana á borð við Iceland Hotel Collection By Berjaya, RÚV, Hertz, Luxor, Íslandsstofu, TVG Zimsen, fjölda sendiráða víða um heim og margra fleiri.
