Kúrekinn hlýtur Gullna lundann 2017

Lokahóf RIFF, Alþjóðlegrar kvikmyndahátíðar í Reykjavík fór fram í Þjóðleikhúskjallaranum fyrr í kvöld. Þar var hátíðinni formlega slitið og verðlaun veitt í fimm keppnisflokkum. Það er RIFF mikil ánægja að vekja athygli á því að fjórir af þeim fimm leikstjórum sem voru verðlaunaðir í ár eru konur en það var Chloé Zhao sem hlaut aðalverðlaun hátíðarinnar, Gullna lundann, fyrir The Rider.

***********

1. Vitranir / New Visions
Keppnisflokkurinn Vitranir inniheldur þrettán myndir en þær eiga sameiginlegt að vera fyrsta eða annað verk leikstjóra, ögra viðteknum gildum í kvikmyndagerð og vísa veg kvikmyndalistarinnar til framtíðar.

Myndin Kúrekinn / Rider (USA) í leikstjórn Chloé Zhao hreppti aðalverðlaun hátíðarinnar, Gullna lundann en hún hlaut einnig verðlaun í Cannes og var ákaft fagnað þar. The Rider verður sýnd aftur 8. október í Háskólabíói kl 20:15

Eftir að hafa séð verðlaunamynd ársins hafði Werner Herzog, heiðursgestur RIFF, þetta að segja: „Einmitt þegar maður fer að halda að kvikmyndagerð sé að staðna kemur mynd á borð við þessa eins og þruma úr heiðskýru lofti. Það er mjög hvetjandi.“ Fyrir óvenjulega næmni, framúrskarandi kvikmyndatöku, átakanlega frammistöðu þeirra sem ekki leika og eftirtektarverða hæfileika til að endurmeta hugmyndir okkar um ameríska karlmennsku, veitir dómnefndin Gullna lundann til Chloé Zhao fyrir The Rider.-

Í dómnefnd sátu Auður Ava Ólafsdóttir, Mark Rabinowitz og Sol Bondy.

***********

2. Önnur Framtíð / A Different tomorrow
Í þeim flokki mátti finna ellefu áhrifamiklar heimildamyndir sem eiga það sameiginlegt að fjalla um mannréttinda- og umhverfismál.

Myndin Grab and Run / Hrifsið og flýið (Kyrgyzstan/Spánn) í leikstjórn Roser Corella var sigurmynd flokksins. Myndin verður sýnd klukkan 14:45 í sal 2 í Háskólabíó á morgun, sunnudaginn 8. október, en leikstjóri hennar svarar spurningum áhorfenda að sýningu lokinni.
Margbrotin og göfug mynd um menningarvenjur sem helst eiga heima í martröðum. Myndin fer fram úr öllum fyrirfram mótuðum hugmyndum og kafar djúpt ofan í atriði er varða stjórnmál, siðferði og venjur samfélagsins með því að gefa þeim sem fyrir mestum áhrifum verða af venjunni tækifæri á að tjá sig. Myndin þvingar áhorfendur til að viðurkenna að einfaldar lausnir eru ekki til þegar svo margar og ólíkar grundvallarhugmyndir um samfélagið mætast.-

Mynd Timothy George Kelly Brexitannia (Bretland) hlaut sérstaka viðurkenningu dómnefndar.
Fyrir fjölhliða sýn á mikilvægan atburð í evrópskum stjórnmálum, þar sem raddir kjósenda fá að heyrast. Sögur sem eru á sama tíma óþægilegar og skemmtilega lausar við það sem alla jafnar einkennir stjórnmálaumræðuna.-

Myndin Síðasta selveiðiferðin / One Last Hunt (Noregur) fékk einnig sérstaka viðurkenningu en hún er í leikstjórn Trude Berge Ottersen og Gry Elisabeth Mortensen.
-Fyrir stórkostlega, fallega og blóðuga mynd af iðju sem sumir líta á sem verðmæta hefð en aðrir fordæma. Þessi margslungna saga fangar viðfangsefni sín á óttalausan hátt en tilfinningar og samkennd áhorfandans sveiflast eins og bárurnar sem slást í skipið, sögusvið myndarinnar.-

Í dómnefnd sátu Jason Gorber, Ragnheiður Skúladóttir og Herbert Sveinbjörnsson.

***********

3. Íslenskar stuttmyndir / Icelandic shorts

Íslenski stuttmyndaflokkurinn er styrktur af RÚV og munu þeir taka verðlaunamyndina til sýningar fyrir almenning.

Myndin Atelier (Ísland) í leikstjórn Elsu Maríu Jakobsdóttur hlaut verðlaun sem besta íslenska stuttmyndin.
-Keppnin var mjög hörð í flokki íslenskra stuttmynda og mikið af sterkum myndum og ljóst að íslensk stuttmyndagerð er á uppleið. Myndin hefur sterk höfundareinkenni og fangar áhorfendur inn í sinn heim.-

Mynd Tinnu Hrafnsdóttur, Munda, hlýtur sérstaka tilnefningu dómnefndar. -Sterk og mannleg mynd sem sýnir að leikstjórinn hefur gott vald á miðlinum.-

Sérstök verðlaun hlaut einnig Nightlight / Næturbirta í leikstjórn Marc-André Morissette.

***********

4. Erlendar stuttmyndir / International shorts

Í flokki erlendra stuttmynda og var það myndin Copa Loca (Grikkland) í leikstjórn Christos Massalas sem hlaut verðlaunin í þessum flokki.
-Myndin er fersk og hægt að skilja á marga vegu ásamt því að vera með sérstakan stíl.-

Sérstaka tilnefningu hlaut The Jungle Knows You Better Than You Do (Kolombía) eftir Juanita Onzaga.
-Fyrir áhrifamikla og sérstaka sýn á viðfangsefnið.-

Í dómnefnd stuttmyndaflokksins sátu Fahad Falur Jabali Fahad, Ásdis Sif Gunnarsdóttir og Ari Allansson

***********

5. Gullna eggið
Gullna eggið kemur í hlut bestu myndarinnar á Reykjavík Talent Lab og í ár er það mynd Charlotte Scott-Wilson Hold on.
-Fyrir að segja einfalda en áhrifamikla sögu af ungum sellóleikara sem þarf að takast á við eigin ótta til að halda stöðu sinni í hljómsveit, notkun á afgerandi sjónrænu máli og hrífandi hljóðhönnun. Við erum sannfærð frá upphafi og stöndum 100% með aðal sögupersónuninni á á sálfræðilegu ferðalagi sínu um kappsfullan og stundum fjandsamlegan heim hljómsveitarinnar.-

Í dómnefnd sátu Grímur Hákonarson, Janus Bragi Jakobsson og Helga Rakel Rafnsdóttir.

 

Skildu eftir svar

Netfang þitt verður ekki birt. Nauðsynlegir reitir eru merktir *