Katja Adomeit kemur á RIFF

Katja Adomeit er einn af heiðursgestum RIFF og fær nafnbótina Upprennandi meistari. Katja er þýskur framleiðandi sem býr í Danmörku og Þýskalandi. Hún hefur sérstakt dálæti á þeirri hlið framleiðslunnar sem snýr að sköpun og fjármögnun. Katja er stöðugt á höttunum eftir nýjum hugmyndum og ólíkum aðferðum við þróun og framleiðslu, sem gefa nýja og óvænta niðurstöðu. Katja er meðal annars þekkt fyrir myndirnar Wolf and Sheep, The Orphanage, The Weight of Elephants, Pine Ridge, Loving Pia, Force Majeure, Team Hurricane, The Square og margar fleiri. Hún hefur starfað víða um lönd, þar á meðal í Afganistan, Tadsíkistan, Þýskalandi, Frakklandi, Rússlandi, Úkraínu og á Nýja Sjálandi.

Hún stofnaði sitt eigið framleiðslufyrirtæki, Adomeit Film, í Danmörku og Þýskalandi þar sem hún framleiðir alþjóðlegar leiknar kvikmyndir með sérstaka áherslu á listrænar myndir eftir ungt kvikmyndagerðarfólk frá öllum heimshornum. Markmið Kötju er að sameina list og afþreyingu.

Á RIFF verða sýndar þrjár myndir úr fórum hennar: The Orphanage (Munaðarleysingjahælið) sem keppir í Vitrunum, Team Hurricane (Stormsystur) og Resin (Kvoða).