Níu myndir sem keppa um aðalverðlaunin kynntar

Í Vitrunum tefla níu nýir leikstjórar fram sinni fyrstu eða annarri mynd og keppa um aðalverðlaun hátíðarinnar, Gullna lundann. Þessar myndir ögra viðteknum gildum í kvikmyndagerð og vísa veg kvikmyndalistarinnar til framtíðar.

NUESTRAS MADRES/Mæður okkar/Our mothers

BEL, FRA, César Díaz, 77 min., 2019

Árið er 2018 í Gvatemala. Landið er undirlagt af réttarhöldum yfir herforingjunum sem komu borgarastyrjöldinni af stað. Vitnisburðir fórnarlamba streyma inn. Ernesto er ungur mannfræðingur sem starfar hjá Forensic Foundation stofnuninni við að bera kennsl á þá sem týndust. Einn daginn heyrir hann frásögn gamallar konu sem gefur vísbendingu um föður hans sem var skæruliði og týndist í stríðinu. Þvert á óskir móður sinnar einhendir hann sér í rannsókn málsins í leit að sannleika.

Stikla: https://www.youtube.com/watch?v=2ENs6UqS43I

 

THE ORPHANAGE/Munaðarleysingjahælið

DNK, DEU, FRA, LUX, AFG, QAT, Shahrbanoo Sadat, 90 min., 2019

Á seinni hluta níunda áratugarins býr hinn fimmtán ára Qodrat á götum Kabúls og selur bíómiða á svörtum markaði. Hann er mikill aðdáandi Bollywood mynda og lifir sig sterkt inn í uppáhalds atriðin úr myndunum. Dag einn fer lögreglan með hann á sovéska munaðarleysingjahælið. En stjórnmálaástandið er að breytast í Kabúl. Qodrat og öll börnin vilja verja heimili sitt.

Stikla: https://www.youtube.com/watch?v=hgsjbrAurGg

 

THE LAST AUTUMN/Síðasta haustið

ISL, Yrsa Roca Fannberg, 78 min, 2019

Það húmar að hausti þar sem vegurinn endar að Krossnesi í Árneshreppi. Þar er sveitabær Úlfars og eiginkonu hans og fjölskyldan kemur til þeirra til að aðstoða við smölun. Barnabörnin koma úr borginni til að taka þátt en hjónin hafa ákveðið að bregða búi svo þetta er síðasta haustið sem þau smala. Hér er á ferðinni einstök innsýn inn í samband mannsins við náttúruna og dýrin. Í þessari heimildarmynd verðum við vitni að umbreytingu sem kallast á við söguna og alla bændurna sem standa í sömu sporum í fortíð og framtíð.

Stikla: https://vimeo.com/345006992

 

BURNING CANE/Brennandi reyr

USA/Bandaríkin, Phillip Youmans, 78 min., 2019

Sögusviðið eru reyrakrar í sveitum Louisiana þar sem trúuð móðir reynir að samræma trúarsannfæringu sína og ástina á þjökuðum syni sínum. Phillip Youmans var 17 ára þegar hann skrifaði, leikstýrði og tók upp myndina. Myndin hlaut Founders Award á Tribeca kvikmyndahátíðinni.

 

MATERNAL/Í móðurætt

ITA, ARG, Maura Delpero, 91 min., 2019

Lu og Fati eru barnungar mæður sem búa í kristnu athvarfi í Buenos Aires. Systir Paola kemur frá Ítalíu til að ganga í klausturregluna. Þegar önnur stúlkan stingur af tekur hin unga nunna barnið að sér. Myndin var frumsýnd á Locarno kvikmyndahátíðinni.

 

IVANA THE TERRIBLE/Hræðilega Ívana/Ivana cea Groaznică

ROU, SRB, Ivana Mladenović, 86 min., 2019

Ívana býður vinum, fjölskyldumeðlimum og fyrrum elskhugum að leika sjálfa sig og tilfinningar sínar í handritsútgáfu af sögu um konu sem er á barmi taugaáfalls. Við landamæri Dónár verður drama að gamanleik. Ivana Mladenović skrifar, leikstýrir og leikur aðalhlutverkið í þessari beittu kómedíu, sem inniheldur raunverulega fjölskyldumeðlimi hennar og gerist í bænum þar sem hún ólst upp. Ivana hristir upp í litlu veröldinni sinni í þessari skálduðu ævisögu, þar sem kvíði helst í hendur við sérvisku, ástir ferðast jafn hratt og aðdróttanir og fólk er jafn hjákátlegt og það er viðkvæmt.

Stikla: https://www.youtube.com/watch?v=3AW96zQDE3A

 

THE LIGHTHOUSE/Vitinn

USA, Robert Eggers, 109 min., 2019

Ný sálræn hrollvekja frá Robert Eggers, sem sló eftirminnilega í gegn með hinni frábæru mynd The Witch. Vitinn er tekin á 35mm svarthvíta filmu og fylgir tveimur vitavörðum (Willem Dafoe og Robert Pattinson) hægt og bítandi á vit sturlunar á afskekktri eyju á Nýja Englandi í byrjun 19. aldar. Enginn sannur hrollvekjuunnandi má láta þessa framhjá sér fara!

Stikla: https://www.youtube.com/watch?v=Hyag7lR8CPA

 

CORPUS CHRISTI/Líkami Krists

POL, FRA, Jan Komasa, 116 min., 2019

Hér er sögð saga hins tvítuga Daníels, sem verður fyrir trúarlegri vakningu þegar hann dvelur í unglingafangelsi. Hann vill verða prestur en sakaferill hans kemur í veg fyrir það. Þegar hann er sendur til að starfa á trésmíðaverkstæði í litlum bæ mætir hann á svæðið í prestshempu og tekur af slysni við söfnuðinum.

Stikla: https://vimeo.com/356233731

 

ABOU LEILA

DZA (Algeria), FRA, QAT, Amin Sidi-Boumédiène, 139 min., 2019

Árið er 1994 í Alsír. Æskuvinirnir S. og Lotfi fara yfir eyðimörkina í leit að Abu Leila sem er hættulegur hryðjuverkamaður. Þessi áætlun virðist fráleit, þar sem að Sahara eyðimörkin hefur sloppið undan árásum. Í raun hefur Lotfi aðeins eitt markmið, að tryggja öryggi S., þar sem hann veit að vinur sinn er of brothættur til að höndla frekari blóðsúthellingar. Hér er á ferðinni kraftmikið sálfræðidrama um samfélagsleg áhrif ofbeldis.

Stikla: https://www.youtube.com/watch?v=jLhThLhXxew

 

Í dómnefndinni sitja:

Jakub Duszynski sem sér um dreifingu kvikmynda, er dagskrárstjóri og fyrrverandi forseti Europa Distribution.

Nick Davis sem er kvikmyndagagnrýnandi hjá Film Comment og dósent í kvikmyndafræði við Northwestern háskólann í Bandaríkjunum.

Steinunn Ólína Þorsteinsdóttir sem er íslensk leikkona.