Hátíðin

RIFF – Alþjóðleg kvikmyndahátíð í Reykjavík – er einn stærsti og fjölbreyttasti menningarviðburðurinn á Íslandi. RIFF er sjálfstæð óháð kvikmyndahátíð sem rekin er án hagnaðar. Starfsfólk okkar vinnur allan ársins hring við undirbúning en þegar nær dregur hátíð kemur inn fjöldi sjálfboðaliða frá öllum heimshornum og eigum við þeim mikið að þakka.

Í ellefu daga á hverju hausti flykkjast Íslendingar í bíó til að sjá það besta og ferskasta í alþjóðlegri kvikmyndagerð. Enn fremur býðst gestum að spjalla við leikstjóra um verk sín, sækja málþing og fyrirlestra, tónleika og listasýningar, og að sjá kvikmyndir við óhefðbundin skilyrði –  í sundi, í helli eða í stofunni hjá þekktum kvikmyndagerðarmanni!

Dagskráin setur unga kvikmyndagerðarmenn og framsækna kvikmyndagerð á oddinn. Aðalverðlaun hátíðarinnar, Gyllti lundinn, eru til dæmis tileinkuð kvikmyndagerðarmanni fyrir sína fyrstu eða aðra mynd.

Hjá RIFF trúum við því að bíó geti breytt heiminum. Heimildarmyndir skipa sífellt stærri sess í dagskrá hátíðarinnar og leiknar myndir sem láta sig sérstaklega varða mannréttindi, lífsgæði og umhverfismál fá ríkulegt pláss.

RIFF er ekki síður mikilvægur vettvangur fyrir íslenska kvikmyndagerðarmenn til að kynna verk sín fyrir umheiminum. Fjöldi erlendra blaðamanna og bransafólks sækir hátíðina ár hvert og áhugi þeirra á því að kynna sér íslenskar kvikmyndir leynir sér ekki. Hátíðin reynir að sýna framleiðslu liðins árs, frumsýna nýjustu myndirnar og gera íslenskri stuttmyndagerð hátt undir höfði. Besta íslenska stuttmyndin fær verðlaun frá RÚV, sem kaupir sýningarrétt hennar, en Gullna eggið kemur í hlut bestu stuttmyndarinnar sem tekur þátt í Kvikmyndasmiðju RIFF (Talent lab).

Næsta hátíð verður sú fimmtánda í röðinni og mun hún standa yfir frá 27.september – 7. október 2018. Dagskrá hátíðarinnar verður kynnt í september.

Hátíðarpassar sem gefa handhafa aðgang að öllum sýningum eru nú fáanlegir í vefverslun okkar. Þar má einnig kaupa klippikort sem gilda á 8 sýningar.

Eldri borgarar og öryrkjar fá passann á afsláttarkjörum.

Hátíðarpassi: 16.900 kr.
Hátíðarpassi á afslætti: 13.900 kr.
Klippikort: 9.600 kr.
Stakir miðar á sýningar: 1.600 kr.

Dagskráin

Síðustu ár hafa um 100 kvikmyndir í fullri lengd frá um 40 löndum verið sýndar á RIFF. Kvikmyndunum er skipt í nokkra flokka til að gera allt sem hentugast fyrir gesti hátíðarinnar. Flokkarnir hafa smám saman myndast og í dag eru þeir eftirfarandi:

Vitranir (keppnisflokkur um Gullna lundann, aðalverðlaun RIFF) – í Vitrunum tefla nýir leikstjórar fram sinni fyrstu eða annarri mynd og keppa um aðalverðlaun hátíðarinnar, Gullna lundann. Þessar myndir ögra viðteknum hefðnum í kvikmyndagerð og leiða kvikmyndalistina á nýjar og spennandi slóðir.

Fyrir opnu hafi – á hverju ári þyrla sömu myndirnar upp ryki hér og þar um heiminn. Þetta eru meistarastykki sem eru sum hver úr smiðju þekktra kvikmyndagerðarmanna á meðan önnur koma áhorfendum algjörlega í opna skjöldu.

Önnur framtíð – beinir sjónum að mikilvægum heimildarmyndum sem varpa ljósi á helstu málefni líðandi stundar er snerta samskipti manns og náttúru.

Heimildarmyndir – verða sífellt vinsælli. RIFF sýnir heimildarmyndir um tónlist, list, menningu, heiminn og tækni og svo mætti lengi telja.

Sjónarrönd – kvikmyndagerð ákveðins lands er í sviðsljósinu á hverri hátíð. Árið 2017 var það Finnland en í ár 2017 verða það Eystrasaltslöndin.

Upprennandi meistari – þessi flokkur veitir innsýn inn í störf kvikmyndagerðarmanns sem er farinn að vekja athygli fyrir verk sín og er af mörgum talinn upprennandi meistari. Valeska Grisebach var upprennandi meistari RIFF 2017.

Heiðurverðlaunahafi – RIFF veitir kvikmyndaleikstjóra verðlaun fyrir æviframlag til kvikmyndalistarinnar. Af því tilefni býðst hátíðargestum að sjá sígildar kvikmyndir leikstjórans. Heiðurgestur RIFF 2018 er Jonas Mekas.

Gullna eggið – Myndir frá þátttakendum í Reykjavík Talent Lab eru sýndar og keppa um verðlaunin Gullna eggið.

Íslenskar stuttmyndir

Alþjóðlegar stuttmyndir

Heiðursgestir fyrri ára

Heiðursgestir RIFF frá upphafi eru Jim Jarmusch, Mike Leigh, Ruben Östlund, Milos Forman, Peter Greenaway, Costa-Gavras, Hanna Schygulla, Béla Tarr, Aki Kaurismäki, Hal Hartley, Shirin Neshat, Susanne Bier, Atom Egoyan, Abbas Kiarostami, Dario Argento, Thomas Bangalter, Guy-Manuel de Homem Christo, James Marsh, Lone Scherfig, Marjane Satrapi, Aleksandr Sokurov, Andrea Arnold, Ulrich Thomsen, Ulrike Ottinger, Damo Suzuki, Darren Aronofsky, Deepa Mehta og fleiri.

Sýningar í dag

Tími Viðburdur