VERÐLAUNAHÁTÍÐ SÓLVEIGAR ANSPACH
Stuttmyndasýning á verðlaunahátíð Sólveigar Anspach 28. september kl. 15 á RIFF
Verðlaun kennd við kvikmyndagerðarkonuna Sólveigu Anspach, sem lést árið 2015, verða veitt í áttunda sinn á Alþjóðlegri kvikmyndahátíð í Reykjavík, RIFF, á sérstakri sýningu og verðlaunaafhendingu í Háskólabíó sunnudaginn 28.september kl. 15.
Franska sendiráðið á Íslandi og Alliance Française í Reykjavík standa að baki Sólveigar Anspach verðlaununum með stuðningi Reykjavíkurborgar, Kvikmyndamiðstöðvar Íslands og RIFF.
Tilgangur verðlaunanna er að heiðra minningu Sólveigar Anspach og hvetja ungar konur til dáða í kvikmyndaleikstjórn. Verðlaunin eru veitt konum fyrir fyrstu stuttmynd þeirra á frönsku og íslensku, tungumálunum hennar Sólveigar. Aðgangur er ókeypis og léttar veitingar verða í boði að verðlaunaafhendingu lokinni (um kl.17).
Verðlaun Sólveigar Anspach, sem franska sendiráðið á Íslandi og Alliance Française í Reykjavík settu á fót árið 2015, eru veitt konum fyrir fyrstu stuttmyndir þeirra á frönsku eða íslensku, tungumálum Sólveigar Anspach, og er þeim ætlað að hvetja ungar konur til dáða í kvikmyndaleikstjórn. Tvenn verðlaun eru veitt í stuttmyndakeppninni, ein fyrir bestu stuttmyndina á frönsku og önnur fyrir þá bestu á íslensku.
Þegar hefur verið tilkynnt hvaða konur hljóta verðlaunin í ár. Val dómnefndar í flokki mynda á frönsku er Sur la Touche eftir Kahina Ben Amar og í flokki mynda á íslensku er það Brúðurin eftir Hjördísi Jóhannsdóttur. Hjördís fékk auk þess boð á Alþjóðlegu stuttmyndahátíðina í Clermond-Ferrand í Frakklandi með stuðningi sendiráðs Íslands í París.
Kvikmyndagerðarkonan Hjördís Jóhannsdóttir hlaut verðlaunin fyrir bestu íslensku stuttmyndina í ár fyrir stuttmynd sína Brúðurin.
Frá Hjördísi um verðlaunin:
„Að hljóta verðlaun Sólveigar Anspach er mikill heiður og kom skemmtilega á óvart.
Það hefur lengi verið draumur hjá mér að fara á Clermont Ferrand kvikmyndahátíðina og stóð hún svo sannarlega undir væntingum.
Að sjá yfir þúsund manns koma saman fyrir hádegi á virkum degi og bíða í hátt í klukkutíma til þess að komast inn í bíósal til þess að horfa á stuttmyndir er eitthvað sem ég hélt að gæti ekki gerst en sá þó ítrekað endurtaka sig á hátíðinni.
Clermont Ferrand hefur gefið mér nýja sýn á stuttmyndir og það var mér mikill innblástur að sjá hversu mikil virðing er borin fyrir þessu listformi sem oftast fær ekki mikið pláss.
Ég tók þátt í prógrammi sem heitir Road to Clermont og var samansett af kvikmyndagerðarfólki hvaðan af úr heiminum sem eru að taka sín fyrstu skref í kvikmyndagerð eins og undirrituð. Það er ofboðslega verðmætt að fá að kynnast fólki með ólíkan bakgrunn sem eru að takast á við svipaðar áskoranir sem tengjast listsköpun.
Dagskráin var stíf og spennandi. Við fórum meðal annars á margar sýningar þar sem ég sá nokkrar mjög áhrifamiklar stuttmyndir sem sitja enn í mér, einnig fórum við á masterclass með líbanska leikstjóranum Wissam Charaf, kíktum á shortfilm market, fórum á samkomur þar sem við hittum kvikmyndagerðarfólk sem var með myndir í keppninni og svo mætti lengi telja.
Ég kom heim reynslunni ríkari, full af innblæstri og þakklæti fyrir þetta fallega boð.
Takk kærlega fyrir mig.“