Alþjóðleg kvikmyndahátíð í Reykjavík kynnir með stolti að stórmyndin The Wizard of the Kremlin verður lokamynd RIFF í ár. Hér segir frá hæglátum manni sem fáir telja líklegan til afreka í lífinu. Samt fer það svo að þegar upp er staðið hefur vinnuframlag hans haft úrslitaáhrif á sögu heimsveldis–og heimsins alls.

Við erum stödd í Rússlandi á árunum eftir 1990. Sovétríkin eru liðin undir lok og heimsmynd Kalda stríðsins er gerbreytt. Rússland er á ákveðnum byrjunarreit en ómögulegt er að segja til um hvort það stefnir í átt að umbótum eða glundroða. Framúrstefnulistamaðurinn Vadim Baranov er flinkur á sínu sviði en enginn–nema ef vera skyldi lítt þekktur en slyngur nýliði á pólitíska sviðinu, með skuggalegan bakgrunn frá leyniþjónustunni, að nafni Vladimír Pútín–gat séð fyrir að Baranov myndi beisla eigin sköpunarkraft í þágu ríkisins sem raun bar vitni og verða mikilvægasti ímyndarsmiður og spunameistari Kremlar. Það eru hendur þessa manns sem smíða nýja ímynd Rússlands á bakvið tjöldin og það sem meira er, hann brúar bilið fyrir Pútín frá höfuðstöðvum FSB til Kremlar. Framhaldið þekkja Rússar, og heimurinn allur.