Kvikmyndir

Undanfarin ár hefur RIFF sýnt um 100 myndir árlega frá fjörtíu löndum. RIFF leggur upp úr framsæknum og fjölbreyttum myndum. Til að auðvelda hátíðargestum valið er myndunum raðað í nokkra ólíka flokka.

Vitranir (keppnisflokkur um Gullna lundann, aðalverðlaun RIFF) – í Vitrunum tefla tólf nýir leikstjórar fram sinni fyrstu eða annarri mynd og keppa um aðalverðlaun hátíðarinnar, Gullna lundann. Þessar myndir ögra viðteknum hefðnum í kvikmyndagerð og leiða kvikmyndalistina á nýjar og spennandi slóðir.

Fyrir opnu hafi – á hverju ári þyrla sömu myndirnar upp ryki hér og þar um heiminn. Þetta eru meistarastykki sem eru sum hver úr smiðju þekktra kvikmyndagerðarmanna á meðan önnur koma áhorfendum algjörlega í opna skjöldu.

Ísland í brennidepli – RIFF er skurðpunktur íslenskrar og erlendrar kvikmyndalistar. Í flokknum Ísland í brennidepli eru sýndar nýjar íslenskar stuttmyndir, heimildarmyndir og leiknar myndir í fullri lengd auk mynda sem láta sig landið varða.

Önnur framtíð – beinir sjónum að mikilvægum heimildarmyndum sem varpa ljósi á helstu málefni líðandi stundar er snerta samskipti manns og náttúru.

Heimildarmyndir – verða sífellt vinsælli. RIFF sýnir heimildarmyndir um tónlist, list, menningu, heiminn og tækni og svo mætti lengi telja.

Unga fólkið – RIFF leggur upp úr að því að ná til ungs fólks og býður upp á kvikmyndasýningar, námskeið og viðburði.

Sjónarrönd – kvikmyndagerð ákveðins lands er í sviðsljósinu á hverri hátíð. Árið 2014 var Ítalía, árið 2013 var Grikkland og þar áður var Þýskaland. Hvaða land verður í fókus á RIFF 2015?

Upprennandi meistari – þessi flokkur veitir innsýn inn í störf kvikmyndagerðarmanns sem er farinn að vekja athygli fyrir verk sín og er af mörgum talinn upprennandi meistari.

Heiðurverðlaunahafi – RIFF veitir kvikmyndaleikstjóra verðlaun fyrir æviframlag til kvikmyndalistarinnar. Af því tilefni býðst hátíðargestum að sjá sígildar kvikmyndir leikstjórans. Árið 2014 var Mike Leigh heiðraður og á meðal annarra heiðurshafa eru Béla Tarr, Susanne Bier og Jim Jarmusch.

Gullna eggið – Myndir frá þátttakendum í Reykjavík Talent Lab eru sýndar og keppa um verðlaunin Gullna eggið.