Frá stofnun RIFF hefur eitt af meginmarkmiðunum verið að veita ungu fólki tækifæri til að tjá sjálfsmynd sína í gegnum kvikmyndagerð. Undanfarin ár hefur barnahátíðin UngRIFF vaxið og dafnað, og er nú glæsileg hátíð fyrir ungmenni landsins. Með því að bjóða upp á fjölbreytta og metnaðarfulla dagskrá kvikmynda fyrir börn og unglinga, skipuleggja vinnustofur og fjölda fræðsluverkefna, vonumst við til að kveikja áhuga sem mun fylgja ungmennunum inn í fullorðinsárin. Við vonumst til að sjá marga framtíðar kvikmyndagerðarmenn spretta upp úr þessum hópi.
UngRIFF býður börnum og unglingum upp á fjölbreytta kvikmyndadagskrá frá öllum heimshornum, með kvikmyndum sem venjulega eru ekki sýndar í íslenskum kvikmyndahúsum. Myndir sem fjalla um félagsleg, umhverfis- og æskulýðsmál vekja oft upp umræður eftir sýningar. Markmið okkar er að hvetja ungmenni til að vera lausnamiðuð þegar þau mæta áskorunum og auka lýðræðislega þátttöku.
UngRIFF hefur frá upphafi starfað í samstarfi við leik- og grunnskóla um allt land. Úrval kvikmynda samanstendur af stuttmyndum og kvikmyndum í fullri lengd, sem eru sérvaldar eftir aldurshópum. Öllum sýningum fylgir kennsluefni til að auðvelda kennurum að fræða nemendur.
UngRIFF vill að kvikmyndagerð sé bæði skemmtileg og fræðandi upplifun. Markmið okkar er einnig að auka kvikmyndalæsi barna. Verkefnin eru fjölbreytt og almennt er lögð áhersla á hópavinnu, samræður og gagnrýna hugsun.
Með því að leggja áherslu á kvikmyndagerð fyrir unga áhorfendur hefur RIFF skapað vettvang þar sem börn og unglingar geta kynnst krafti kvikmyndarinnar og fundið sína eigin rödd í heimi kvikmyndagerðar.
Lykilþema UngRIFF er samframleiðsla og samsköpun. Börn og ungmenni leiða sköpun og framleiðslu verkefna og viðburða undir leiðsögn. Með þá hugmynd að leiðarljósi var ungmennaráð RIFF stofnað. Markmið ungmennaráðsins er að auka lýðræðislega þátttöku ungmenna og gefa þeim tækifæri til að hafa áhrif á mótun og framkvæmd hátíðarinnar. Ráðið samanstendur af fimm ungmennum á aldrinum 12-16 ára frá öllu landinu sem hittast einu sinni í mánuði, eða oftar ef þörf krefur, til að skipuleggja og undirbúa hátíðina ásamt verkefnastjóra hátíðarinnar.
Við kynntum með stolti Ung-norrænu hugveituna [e. Young Voices Nordic Think Tank] sem haldin var í fyrsta sinn á þessu ári. Við buðum norrænum þátttakendum á aldrinum 18–25 ára að taka þátt í öflugri eins dags málstofu undir handleiðslu sérfræðinga, þar sem markmiðið var að endurhugsa og móta sjálfbærari kvikmyndaiðnað.
Markmiðið var að mynda öflugan og öruggan samráðsvettvang þar sem raddir framtíðarleiðtoga í kvikmyndaiðnaði fengju að heyrast og eflast. Á þessum umræðuvettvangi gafst þátttakendum kostur á að beita sér fyrir betri framtíð með markvissum hætti, þar sem stefnt var að því að breyta landslagi iðnaðarins til að mæta betur þörfum og væntingum ungs fólks. Innan Ung-norrænu hugveitunnar skapaðist frjór jarðvegur fyrir nýstárlegar, ferskar hugmyndir og nýjar lausnir sem eru greininni bráðnauðsynlegur vaxtarsproti í síbreytilegum heimi.
Þetta verkefni, sem var fjármagnað af Norræna menningarsjóðnum [e. Nordic Culture Fund], var í takti við sjálfbærnistefnu RIFF sem unnin er með hliðsjón af Heimsmarkmiðum SÞ. Hugveitan efldi ungar raddir til áhrifa og hvatti ungmenni til lýðræðislegrar virkni. Með beinni þátttöku norrænna ungmenna sköpuðust dýrmæt tækifæri til að styðja við sjálfbærari framtíð innan kvikmyndageirans.
Hægt er að lesa skýrslu hugveitunar hér til hliðar. Áhugasamir um verkefnið voru hvattir til að hafa samband við verkefnastjóra UngRIFF, í gegnum netfangið skolar(hja)riff.is.
RIFF hefur frá upphafi boðið upp á fjölda námskeiða og smiðja fyrir ungmenni – t.d. mínútumyndagerð, spuna- og stuttmyndamyndanámskeið. Á kvennaárinu 2015 bauð RIFF upp á Stelpur filma! námskeið í fyrsta skipti, en margir samverkandi þættir gera það að verkum að stelpur og kvárar eru ólíklegri til að prófa sig áfram í kvikmyndagerð og láta rödd sína heyrast. Með Stelpur filma! er stuðlað að því að leiðrétta þennan kynjahalla, með því að bjóða upp á rými þar sem stelpur (cís og trans), transstrákar, kynsegin og intersex ungmenni fá næði til að þroska sína hæfileika og mynda tengsl við fyrirmyndir.
Hér fyrir neðan má sjá yfirlit yfir námskeið RIFF sem hafa verið haldin síðan 2022, alls 10 námskeið fyrir unglingastig grunnskólanna um allt land sem eru haldin á skólatíma. Ýmist hafa námskeiðin verið haldin fyrir stelpur og kynsegin ungmenni eða fyrir alla saman. Í flestum tilfellum voru námskeiðin vikulöng en stundum haldin í skemmri tíma. Þátttaka hefur jafnan verið með afbrigðum góð og almenn ánægja ríkt hjá nemendum og kennurum.
Stelpur Filma!
2022 – Stelpur Filma! námskeið haldin í Borgarnesi, í Hveragerði, í Keflavík og á Egilstöðum
2025 – í Reykjavík
Krakkar Filma!
2023 – námskeið haldin í Borgarnesi og á Ísafirði og nærsveitum
2024 – námskeið haldin á Akranesi og á Ísafirði og nærsveitum
2024 – námskeið haldið í Reykhólum
“Námskeiðið var mjög vel heppnað, stelpurnar voru ánægðar og örugglega mun sú fræðsla sem þær fengu vera gott veganesti út í lífið. Stelpur filma er mjög gagnlegt fyrir stelpur sem eru í unglingdeild. Þær eru á viðkvæmum aldri þar sem margt í þjóðfélaginu hefur áhrif á þær og mótar viðhorf þeirra og sjálfsmynd þeirra. Stelpur filma styrkir þær og eflir sjálfstraust þeirra. Auk þess var námskeiðið gagnlegt fyrir kennara.”
Umsögn kennara um Stelpur filma!
![EU flag-Crea EU + MEDIA [COLOR]](https://riff.is/wp-content/uploads/elementor/thumbs/EU-flag-Crea-EU-MEDIA-COLOR-r6kmd8h0gfj4li1y6au7hv6ix9wkvk31uko5c0qosg.png "EU flag-Crea EU + MEDIA [COLOR]")
