ÖNNUR FRAMTÍÐ

Þessi dagskrárflokkur hefur á undanförnum árum notið sífellt meiri vinsælda meðal gesta okkar og hvetur til gagnrýninna samræðna sem hjálpa okkur öllum að verða betri borgarar jarðar. Þetta er eini keppnisflokkur hátíðarinnar sem er eingöngu tileinkaður heimildamyndum, og upplifa áhorfendur hversu öflugt tæki frásögnin í kvikmynd er til að vekja til vitundar um umhverfis- og samfélagsmál.

Sýningum í þessum flokki fylgja innihaldsríkar umræður þar sem spurt er og svarað, og eru órjúfanlegur hluti af Umhverfisdagskrá RIFF. Þessar umræður eru einstakt tækifæri fyrir áhorfendur til að taka virkan þátt í samtali með kvikmyndagerðarfólki, sérfræðingum og aðgerðarsinnum, dýpka skilning sinn á sjálfbærni og umhverfismálum og fá hvatningu til raunverulegra aðgerða.

Að auki hefur RIFF veitt viðurkenningar fyrir vistvænt framlag, meðal annars með verðlaununum Græna lundanum.

YOUNG VOICES NORDIC THINK TANK

Með stuðningi frá Norræna menningarsjóðnum undir Volt-áætluninni og Loftslagsaðgerðasjóði ungs fólks hjá Reykjavíkurborg leiddi þetta framtak saman unga kvikmyndagerðarmenn á aldrinum 18–25 ára til að ræða og þróa aðferðir til að takast á við umhverfisáskoranir á Norðurlöndum. 

Ellefu þátttakendur – þar á meðal leikstjórar, framleiðendur, kvikmyndatökumenn og handritshöfundar – tóku þátt í líflegum umræðum um gerð sjálfbærra kvikmynda og hvernig innleiða má vistvæn vinnubrögð í auknum mæli í kvikmyndagerð. Hugmyndir þeirra voru teknar saman í skýrslu sem kynnt var lykilaðilum innan greinarinnar, meðal annars menningarmálaráðum Norðurlanda á fundi Norðurlandaráðs í Reykjavík.
Young Nordic Voices Think Tank var ekki aðeins vettvangur fyrir lausnir undir forystu ungs fólks heldur myndaði einnig tengslanet fyrir samstarf til framtíðar og lagði þannig sitt af mörkum til grænni og sjálfbærari kvikmyndaiðnaðar.

KVIKMYNDIR FRÁ NORÐURSLÓÐUM

Þessi dagskrá varpar ljósi á kvikmyndir frá þessum landsvæðum sem fjalla um einstakar áskoranir og sögur um lífið á Norðurslóðum. Hún er kvikmyndagerðarfólki vettvangur til að koma á framfæri sjónarmiðum sínum um loftslagsbreytingar, seiglu samfélaga í krefjandi umhverfi og verndun menningararfs. Með þessum myndum viljum við styrkja rödd Norðursins og sýna hvernig frásagnir geta hvatt til jákvæðra breytinga og stuðlað að aukinni vitund á heimsvísu um umhverfis- og samfélagsmál.

THE NORTH IMPACT WORKSHOP

Þessi tveggja daga vinnusmiðja er skipulögð til að styðja við heimildamyndaverkefni í mótun með því að skerpa á markmiðum þeirra og aðferðum til áhrifa. Norðurslóðir standa frammi fyrir hvað mestum áhrifum af völdum loftslagsbreytinga og samfélög nálægt og norðan heimskautsbaugs eru meðal þeirra fyrstu til að upplifa afleiðingar þeirra. Hefðbundnir lifnaðarhættir standa frammi fyrir ógnum vegna hopandi jökla, hækkandi sjávarhita og sífellt óútreiknanlegra veðurfars.

RIFF trúir því að sagnafólk frá Norðurslóðum sé í einstakri aðstöðu til að hafa áhrif á alþjóðlega umræðu um loftslagsmál og móta stefnu í gegnum kvikmyndir sínar.

UMHVERFISDAGSKRÁ OG GRÆNI LUNDINN 

RIFF heldur áfram að auka vitund um umhverfismál í gegnum dagskrá sína, sérstaklega í flokknum Önnur framtíð, þar sem sýndar eru myndir sem fjalla um loftslagsbreytingar, náttúruvernd og hnattrænar áskoranir tengdar sjálfbærni. Hátíðin veitir einnig Græna lundann, en það eru verðlaun til kvikmyndagerðarmanns sem hefur lagt sitt af mörkum til umhverfismála í starfi sínu.

Að auki leggur RIFF sitt að mörkum með því að virkja ungt fólk til umræðu um sjálfbærni og bjóða upp á fræðslu um vistvænar frásagnaraðferðir.

SAMSTARF VIÐ ARCTIC CIRCLE ALLIANCE 

RIFF hefur bætt við starf sitt í átt að aukinni sjálfbærni með nýju samstarfi við Arctic Circle Alliance. Í ljósi þess að norðurslóðir eru í öldufaldi loftslagsbreytinga er markmið samstarfsins að varpa ljósi á sögur af frumbyggjasamfélögum og lífinu á norðurslóðum og styðja við stefnumótun sem verndar viðkvæm vistkerfi svæðisins. Liður í þessu framtaki er að RIFF mun sýna sérstakan dagskrárflokk, Kvikmyndir frá Norðurslóðum, sem dregur fram sögur frá Norðurskautssvæðinu og endurspeglar þær aðkallandi umhverfis- og menningarlegu áskoranir sem svæðið stendur frammi fyrir.

Til að auka aðgengi áhorfenda að þessum myndum færir RIFF Kvikmyndir frá Norðurslóðum einnig inn á Arctic Circle ráðstefnuna sem haldin er árlega í Reykjavík, þar sem áhrifafólk á sviði stjórnmála, umhverfismála og vísinda kemur saman til að ræða framtíð norðurslóða. Með því að samþætta kvikmyndalistina við umræðu áhrifafólks tryggir RIFF að raddir kvikmyndagerðarfólks og frumbyggja nái eyrum aðila sem fara með ákvarðanatökuvald og stuðli þannig að dýpri skilningi á þeim brýnu umhverfis- og samfélagsmálum sem svæðið stendur frammi fyrir. Þetta samstarf stuðlar ekki aðeins að aukinni vitund heldur hvetur einnig til raunhæfra lausna með því að virkja ráðstefnugesti til þátttöku og aðgerða.