Reynsla mín af Alþjóðlegri kvikmyndahátíð í Reykjavík var frábær. Þetta er óvenjulegur staður að öllu leyti, og fólkið er gestrisið, tillitssamt, en líka svolítið villt - sem er frábær blanda að mínu mati. Ég er mjög glaður að búa að þessari reynslu og að hafa fengið að hitta svona mikið af flottu fólki sem hefur áhuga á kvikmyndum, tónlist, bókmenntum, álfum og öllum leyndardómum mannlegs eðlis. Takk!

Hér á Íslandi, þarf kvikmyndin að verða annað og meira til þess að fölna ekki í samanburði við náttúruna. En Íslendingar hafa nægilega orku til að áorka hvorutveggja.

Alþjóðleg kvikmyndahátíð í Reykjavík (RIFF) er stærsta kvikmyndahátíð landsins sem haldin verður í 23. sinn frá 24. september til 4. október 2026. Á RIFF hvert ár eru sýndar um 80 kvikmyndir í fullri lengd og fjöldi stuttmynda hvaðanæva að úr heiminum, Upplifðu kvikmyndatöfra á hvíta tjaldinu á RIFF.

Hátíðin var lítil í upphafi og einblíndi aðallega á Íslendinga sem tóku upp kvikmyndir erlendis, en RIFF hefur vaxið og orðið að hátíð sem er ekki bara stærsti kvikmyndaviðburðurinn á Íslandi heldur einnig sífellt mikilvægari viðkomustaður þeirra sem vilja sjá það besta í evrópskri kvikmyndalist.

Á RIFF 2026 er eitthvað fyrir alla: Kynntu þér UngRIFF þar sem boðið er upp á skólasýningar, fjölskyldumyndir og hagnýtar vinnustofur; Taktu þátt í Bransadögum þar sem Ísland er kynnt sem kvikmyndaland og rætt er um málefni sem varða bransann; og ekki missa af Talent Lab, þar sem framúrskarandi kvikmyndagerðarmenn læra af reynsluboltum í faginu.

RIFF er jafnframt þekkt fyrir sérviðburði sem koma á óvart, s.s. sjónræna matarupplifun, sundbíó, hellabíó og tónleika, sem gera hátíðina ógleymanlega. Miðasala á stakar sýningar hefst í september en unnt er að tryggja sér passa og klippikort hér á síðunni. Framundan eru spennandi 11 kvikmyndadagar með nýjum og framúrskarandi myndum og ógleymanlegum sérviðburðum.

Markmið okkar eru að breyta kvikmyndamenningunni með því að sýna framúrskarandi kvikmyndir sem kæmu annars ekki til landsins, efla umræðu og kvikmyndalæsi, knýja fram samfélagslegar umbætur með mætti kvikmynda og kynna kvikmyndalandið Ísland.

Kvikmyndahátíðir eru meira en bara sýningar á kvikmyndum–þær eru upplifanir sem endurspegla menningu og anda borganna sem hýsa þær. Alþjóðlega kvikmyndahátíðin í Reykjavík er fyrirmyndardæmi um hvernig kvikmyndahátíðir geta dafnað með því að umfaðma sérkenni sín.