0%
Ung-Norræna hugveitan fer nú fram í þriðja sinn og er sem fyrr hugsuð sem þátttökuvettvangur fyrir ungt og upprennandi listafólk frá Íslandi og hinum Norðurlöndunum milli 18 og 30 ára. Hugveitan er hvorki pallborð né fyrirlestur, heldur virkur vettvangur þar sem ungt fólk fær rými til að tala frá hjartanu um veruleika þeirra sem eru á fyrstu metrum ferilsins í kvikmyndagerð, þar sem reyndir einstaklingar úr greininni taka þátt í raunverulegu samtali.
RIFF er innilega umhugað um að skapa rými fyrir nýjar raddir. Við trúum því að framtíð norrænnar kvikmyndagerðar velti á því að hlusta á nýjar raddir úr kvikmyndagerð samtímans.
Þriðja útgáfa hugveitunnar fór fram í Norræna húsinu 30. september 2026. Að þessu sinni var spurt: „Hvað þarf til þess að byggja upp líf og feril sem handritshöfundur á Norðurlöndum og Norðurslóðum í dag, og hverju þarf að breyta?“
Hugveitan leiddi saman tíu þátttakendur úr Norðurslóða handritasmiðjunni ásamt þremur handritshöfundum frá Íslandi á mismunandi stigum ferils síns: Davíð Már Stefánsson, Katla Sólnes og Aldís Amah Hamilton.
Önnur atrenna hugveitunnar var haldin í Norræna húsinu 2. október 2025 þar sem 15 þátttakendur, allir búsettir á Íslandi, ræddu út frá þemanu „Ósýnilega miðstigið: Ekki nemi, ekki atvinnumaður – hvað nú?“. Í brennipunktinum var óvissan og efinn sem einkennir ferðalagið frá útskrift til atvinnu í greininni.
Hugveitunni var stýrt af kvikmyndagerðarkonunni Pipaluk K. Jørgensen, sem einnig er stofnandi Alþjóðlegu kvikmyndahátíðarinnar í Nuuk, og leikstjóranum Arnari Má Vigfússyni. Umræður beindust að bæði tilfinningalegum og eiginlegum kostnaði þess að hefja feril í kvikmyndagerð þar sem iðnaðurinn er jafn smár og raun ber vitni. Leiðbeinendurnir Erlendur Sveinsson (Ísland), Francisco Dias (Portúgal) og Valentina Bronzini (Ítalía/Þýskaland) tóku þátt í opnu samtali með þátttakendunum.
Fyrsta hugveitan setti tóninn hvað varðar form og framkvæmd. Með henni var skapað rými fyrir upprennandi listafólk til að tjá sig óhindrað um reynslu sína í síbreytilegum heimi kvikmyndagerðar í samtímanum. Samtalið tók meðal annars fyrir sjálfbærni, aðgengi, inngildingu og breytilegar aðstæður hvað varðar kvikmyndagerð á Norðurlöndunum í dag.
