Á meðan sífellt er sótt að miðlun á lengra formi og endalaust skroll heltekur athygli okkar vill RIFF skapa lifandi vettvang þar sem leikstjórar, tónlistarfólk, kvikmynda- og tónlistarunnendur geta komið saman og fagnað listinni sem felst í tónlistarmyndbandagerð.

Viðburðurinn er haldinn í samstarfi við Smekkleysu og verður haldinn í húsakynnum plötubúðarinnar. Smekkleysa hefur um áratugaskeið sérhæft sig í sölu á íslenskri tónlist og viðburðarhaldi tengdu íslensku tónlistarlífi. 

Innsend myndbönd geta verið myndbönd í vinnslu eða myndbönd sem hafa komið út innan ársins 2026. Sýnd verða ný tónlistarmyndbönd valin af nefnd ásamt sérstöku úrvali eldri verka úr sögu íslenskrar tónlistarmyndbandagerðar. Þar gefst áhorfendum kostur á að uppgötva týndar perlur, áhrifamikil verk og söguleg tónlistarmyndbönd sem hafa sjaldan eða aldrei verið aðgengileg á streymisveitum eða samfélagsmiðlum. Markmiðið er að draga upp mynd af þeirri grósku, fjölbreytni og sköpunarkrafti sem hefur einkennt íslenska tónlistarmyndbandagerð í gegnum tíðina og tengja saman fortíð og nútíð miðilsins. 

Um sýningarhluta eldri tónlistarmyndbanda sér Magnús Leifsson, en verkin endurspegla sögu tónlistarmyndbanda á Íslandi og innihalda verk eftir marga okkar fremstu leikstjóra. Maggi er íslenskur leikstjóri með áratugalangan feril í kvikmynda-, sjónvarps- og auglýsingagerð. Samhliða því að leikstýra þáttum og auglýsingum hefur hann markað sér sterkan sess sem einn af afkastamestu tónlistarmyndbandaleikstjórum landsins og unnið með tónlistarfólki úr fjölbreyttum áttum tónlistarlífsins — allt frá Of Monsters And Men, Retro Stefson, FM Belfast, Ólafi Arnalds og múm til rappara á borð við Birni, Úlf Úlf og Emmsjé Gauta. Verk hans einkennast af leikandi myndmáli, skapandi notkun á hreyfingu og dansi, og eftirminnilegum tökustöðum þar sem sjónræn frásögn og tónlist mætast á lifandi og oft óvæntan hátt.