Það er af nægu að taka af hágæða bíómyndum á RIFF 2026 og eitthvað fyrir alla í dagskrá hátíðarinnar. Við fengum Hrönn Marinósdóttur, stjórnanda RIFF til að velja nokkrar myndir á RIFF í ár sem hún hefur sérstakt dálæti á. Þar kennir ýmissa grasa enda hefur Hrönn farið á flestar af stærstu kvikmyndahátíðum ársins til að finna myndir fyrir dagskrá RIFF.
„Mér finnst úrvalið á RIFF í ár með besta móti og margt sem ég hlakka til að sýna gestum hátíðarinnar,“ segir Hrönn um dagskrána í ár. „Svo erum við með virkilega sterkan hóp erlends fagfólks sem kemur fram á RIFF í ár og tekur þátt í málþingum í kjölfari sýninga, eða eins og við köllum það, Samtöl til áhrifa. Ég hvet fólk endilega til að vera vakandi fyrir þeim sýningum sem eru með slíkt samtal í lok myndarinnar. Það stækkar upplifunina við að sjá myndina svo mikið og tekur á svo mörgum málum sem tengjast umfjöllunarefninu hverju sinni.
La Gradiva – Spor í öskunni
Leikstjóri: Marine Atlan
Bekkur framhaldsskólanema fer til Pompei til að skoða rústirnar og líkin sem Vesúvíus varðveitti undir öskunni. Ferðin reynist einstakt augnablik þar sem kraftur æskunnar mætir heimi þar sem tíminn hefur staðið í stað. Langanir þeirra brjótast upp á yfirborðið af óvæntum ákafa sem leiðir að lokum til þess að hin viðkvæma félagslega mynd sem hópurinn hefur myndað brestur.
Club Kid – Partýpabbi
Leikstjóri: Jordan Firstman
Club Kid er margverðlaunuð mynd sem fjallar um Peter, harðan partýaðdáanda og næturklúbbaskemmtikraft í New York sem lifir óábyrgu og hedonísku lífi. Skyndilega uppgötvar hann að hann á tíu ára son sem hann vissi ekki af. Þegar hann neyðist til að taka ábyrgð á drengnum byrjar lífið smám saman að breytast. Myndin blandar saman gríni, næturlífi, tilfinningum og sögu um óvænt föðurhlutverk og þroska.
Fatherland – Föðurlandið
Leikstjóri: Paweł Pawlikowski
Árið 1949 leggja þýski rithöfundurinn Thomas Mann og dóttir hans Erika upp í bílferð um Þýskaland í rústum, frá Frankfurt, sem er undir stjórn Bandaríkjanna, til Weimar, sem er undir stjórn Sovétríkjanna.
Dua – Dúa
Leikstjóri: Blerta Basholli
Dua gerist í Pristínu seint á tíunda áratugnum þegar spennan milli þjóðarhópa fer vaxandi og stríðið í Kosovo nálgast. Dua er aðeins 13 ára og glímir við breytingar gelgjuskeiðsins og erfiðar aðstæður í samfélaginu. Þegar ákveðinn atburður gerir hana að skotmarki myndar hún náin tengsl við hugrakka stúlku, Maki, sem hvetur hana til mótspyrnu og sjálfstæðis.
Heat – Hiti
Leikstjóri: Jacqueline Zünd
Loftslagsbreytingar raska lífi fólks og samböndum – ekki síst við Persaflóa, þar sem hitinn getur farið yfir 50°C og samfélagið skiptist milli þeirra fáu sem hafa efni á að verja sig gegn hitanum og innflytjenda sem eiga engra annarra kosta völ en að þola hann til að hafa í sig og á.
Christiania – Kristjanía
Leikstjóri: Karl Friis Forchhammer
Með áhrifamiklum og átakanlegum sögum sem spanna meira en 50 ár kannar CHRISTIANIA hvernig samfélag, sem byggt er á frelsi, samstöðu og andófi, heldur áfram að berjast fyrir rétti sínum til að vera til – á eigin forsendum.
Nightborn – Barn næturinnar
Leikstjóri: Hanna Bergholm
Í finnskum skógi hefja Saga og eiginmaður hennar, Jon, nýjan kafla sem foreldrar. En ógnvekjandi skuggi grunsemda um nýfætt barn þeirra hvílir á gleði Sögu, sem Jon veit ekki af, og smám saman myndast gjá á milli þeirra, þegar Saga glímir ein við þann óþægilega sannleika sem hún telur sig hafa uppgötvað. Hún neyðist til að horfast í augu við óttann sem ógnar fjölskyldunni.
Lucy Lost – Týnda stelpan
Leikstjóri: Olivier Clerty
Á Scilly-eyjum árið 1915 vex Lucy úr grasi hjá nánu samfélagi sjómanna, en sjálf man hún lítið úr fortíð sinni. Á meðan fyrri heimstyrjöldin geisar kynnist Lucy dularfullri stelpur sem hjálpar henni að afhjúpa fortíð sína og finna sinn stað í tilverunni.
