NORÐURSLÓÐA HANDRITASMIÐJAN 2026 – VALIN VERKEFNI

Norðurslóða-Handritasmiðjan er þróunarverkefni fyrir handritshöfunda og leikstjóra frá Norðurlöndum sem eru að ryðja sér til rúms og eiga það sameiginlegt að segja frá reynsluheimi fólks á norðlægum slóðum, hvort sem hún tengist náttúrunni, samfélagslegum málefnum, menningu eða pólitík.

Í fyrstu útgáfu handritasmiðjunnar koma saman 10 efnilegir handritshöfundar sem vinna að 8 norrænum kvikmyndaverkefnum. Verkefnin eru á treatment-stigi, þar sem þátttakendur þróa sögurnar áfram, skerpa þematískan fókus þeirra og mynda tengsl við fulltrúa kvikmyndaiðnaðarins á Bransadögum.

Þátttakendur vinna að sinni fyrstu eða annarri kvikmynd í fullri lengd, hvort sem um er að ræða leikna mynd eða heimildarmynd. Fjarkennsla námsstofunnar fara fram dagana 7.–9. ágúst og þeim lýkur með staðkennslu í Reykjavík 30. september–3. október 2026.

Bransadagar RIFF kynna með stolti þau átta verkefni sem valin hafa verið í þessa fyrstu útgáfu handritasmiðjunnar. Leiðbeinandi verkefnisins er Dagur Kári, margverðlaunaður leikstjóri og handritshöfundur. Verkefnið er unnið í samstarfi við Nuuk International Film Festival og er styrkt af Norræna menningarsjóðnum.

Aviliaq — Akku Kristensen, Mo Tan

Tegund: Svört gamanmynd
Lengd: 100 mínútur
Framleiðslulönd: Grænland, Pólland
Tungumál: Grænlenska
Tegund verkefnis: Leikin kvikmynd í fullri lengd

Efniságrip:
Eftir að maki hans yfirgefur hann fyrir dansk-grænlenskan embættismann, sogast hinn raglyndi fiskvinnslumaður Malik inn í myrkan og spaugilegan hefndarþorsta. Hann reynir að sanna að örlög hans séu ekki að feta í fótspor föður síns og endurtaka hina hörmulegu leið Qivittoq. En þegar blind reiði hans rekst á hinn forna sáttmála Aviliaq í mannskæðu óveðri  neyðist Malik til að horfast í augu við brotakennda sjálfsmynd sína.

Yfirlýsing:
Fræið að Aviliaq kviknaði þegar ég rakst á þetta eina grænlenska orð. Í nútímamáli merkir það „maður sem tekur eiginkonu annars,“ en í hefðbundinni inúítamenningu vísar það til heilags sáttmála algers trausts milli veiðimanns og sverðs bróður sem hann fól fjölskyldu sína í umsjá. Þessi tvíræðni er hjarta myndarinnar.

Í gegnum Malik, gallaðan og venjulegan mann, kannar sagan hvernig nútíma Grænland glímir við spennuna milli minningar um hina fornu menningu og langvarandi skugga danskra nýlendutengsla, án þess að falla í einfaldar andstæður á borð við nýlenduherrann gegn nýlendubúanum. Í hrjóstrugu landslagi verður Aviliaq bæði svört gamanmynd og hljóðlát hugleiðing um sjálfsmynd — spurning um hvernig við finnum okkur aftur stað í heimi sem hefur mótast af menningarlegu rofi.

Æviágrip — Mo Tan

Mo Tan fæddist í Kína og er búsett í Varsjá. Hún útskrifaðist árið 2018 úr leikstjórnardeild pólsku kvikmynda-, sjónvarps- og leiklistarakademíunnar í Łódź. Heimildar- og leikin verk hennar fjalla gjarnan um menningarárekstra og siðferðileg álitamál mannlífsins.

Kvikmyndaskrá — Mo Tan

Confessions of a Mole (2025, heimildarmynd, 92 mín.) — heimsfrumsýnd í Envision-keppnisflokknum á IDFA 2025, tilnefnd til verðlauna fyrir bestu frumraun; hlaut verðlaun fyrir bestu frumraun á Millennium Docs Against Gravity 2026.
Sunrise (2021)
Licentia Poetica (2018)
Woo (2016)
Cactus (2013)

Æviágrip – Akku Kristensen:
Akku Kristensen er grænlenskur rithöfundur sem sækir innblástur í veruleika verkalýðsstéttarinnar og menningarlandslag heimalands síns. Starfsreynsla hans við byggingarvinnu, hafnarstörf og á sjúkrahúsi mótaði snemma áhuga hans á togstreitunni milli sjálfsmyndar Inúíta og danskra áhrifa. Aviliaq er fyrsta kvikmyndahandrit hans, skrifað eftir að hann flutti til Póllands.

Kvikmyndaskrá – Akku Kristensen:
Aviliaq er fyrsta kvikmyndahandrit Akku Kristensen.

Hundadagar (í vinnslu) – Andrea Björk Andrésdóttir

Efniságrip:
Þegar Jörgen Jörgensen – betur þekktur hér á landi sem Jörundur hundadagakonungur – sem var danskur skipstjóri í London á tímum Napóleonsstríðanna, lendir í skuldum stofnar hann til viðskiptasamstarfs við kaupmanninn Samuel Phelps og siglir til Íslands þar sem hungursneyð vofir yfir vegna stríðsins. Þegar landstjórinn á Íslandi bannar þeim að stunda viðskipti ákveða þeir að handtaka hann og frelsa Ísland undan yfirráðum Dana – hvað gæti mögulega farið úrskeiðis?

Yfirlýsing:
Hugmyndin að myndinni kviknaði árið 2012 þegar Andrea Björk Andrésdóttir vann við að afrita handskrifaða fangavörn Jörgensens, sem varðveitt er í Breska bókasafninu. Persóna hans og fáránleiki atburðarásarinnar þóttu henni kjörin fyrir kvikmynd. Sagan er sögð á þremur tungumálum – ensku, dönsku og íslensku – og fjallar um árekstur tveggja stríðandi heimsvelda á þessari „umferðareyju“ norðursins, Íslandi, og býður um leið upp á alþjóðlegt samstarf.

Meginþemu myndarinnar eru nýlendustefna, gildrur karlmennskunnar, kapítalismi og stéttaátök; þar sem fortíðin er skoðuð til að varpa ljósi á samtímann. Tónninn sækir innblástur í myndir á borð við The Favourite, Barry Lyndon og The Duellists og hefur húmor að leiðarljósi.

Æviágrip:
Andrea Björk Andrésdóttir er íslensk kvikmyndagerðarkona, myndlistarmaður og grínisti búsett í Berlín. Bakgrunnur hennar er í teikningu og hreyfimyndagerð og hefur hún starfað í enskumælandi uppistandssenu Berlínar frá árinu 2018. Hún hefur skrifað og þróað gamanþáttaröð um Íslendingasögurnar ásamt grínistanum Hugleiki Dagssyni, sem RVK Studios framleiðir fyrir RÚV (2027), þar sem hún starfar einnig sem aðstoðarleikstjóri og hreyfimyndastjóri.

Verkaskrá:
Voice Message (2025, stuttmynd, handritshöfundur/leikstjóri) – frumsýnd á LA Femme International Film Festival í Búdapest.
Ögrum skorið (8 þátta sjónvarpssería, handritshöfundur), RVK Studios, frumsýnd á RÚV árið 2027.

Electrified – Laurens Pérol og Joshua Jádi

Tegund: Spennumynd, drama, umhverfismál
Lengd: 90 mínútur
Framleiðslulönd: Noregur, Austurríki, Þýskaland
Tungumál: Norska, enska, þýska
Tegund verkefnis: Leikin kvikmynd í fullri lengd

Efniságrip:
Dularfullt afl slekkur og kveikir á raforkukerfi Tromsø-borgar líkt og hjartsláttur. Emil, sextugur sérfræðingur í rafmagnsleysi, þarf að velja á milli þess að bjarga borginni og standa við loforð sem hann gaf fjarlægri dóttur sinni, Almu, 31 árs eðlisfræðingi sem stendur á barmi byltingarkenndra uppgötvana á ferlinum.

Þegar þau bæði berjast fyrir stjórn á aðstæðum eiga þau á hættu að glata öllu – þar á meðal hvort öðru og sjálfum sér – í myrkrinu sem að lokum umlykur þau bæði.

Yfirlýsing:
Innblásin af sannri sögu háspennutæknis sem hrundi eftir margra ára vaxandi álag fjallar Electrified um sameiginlega tilfinningu þess að vera „rafmagnaður“ út frá afar persónulegu sjónarhorni – þar sem kulnun einstaklingsins leiðir af sér myrkvun samfélagsins.

Rafmagnið verður myndlíking fyrir frammistöðu, tengsl og hið ósýnilega: hvað verður eftir af okkur þegar við stöndum frammi fyrir þeirri stöðvun sem við óttumst mest? Myndin er jafnframt saga um samband föður og dóttur, um þörfina fyrir ást, fjarveru og það sem við fórnum til að uppfylla væntingar annarra í samfélagi sem krefst sífelldrar frammistöðu.

Æviágrip – Laurens Pérol:
Laurens Pérol fæddist árið 1995 í Stuttgart og er búsettur í Noregi og Austurríki. Hann nam kvikmyndagerð við Filmkunstskolen i Kabelvåg (2017–2020) og er nú að ljúka meistaranámi í leikstjórn við Vínar kvikmyndaakademíuna. Hann hefur starfað sem aðstoðarmaður þekktra norskra leikstjóra, þeirra Ole Giæver og Itonje Guttormsen, og var valinn þátttakandi í dvalarverkefni Ingmar Bergman-stofnunarinnar á Fårö árið 2026.

Verkaskrá – Laurens Pérol:
Å ØVE (Practice) – frumsýnd á Norsku kvikmyndahátíðinni 2023. Myndin hlaut verðlaun fyrir bestu frumraun í fullri lengd á Nordic Film Days Lübeck, verðlaun fyrir bestu leiknu mynd á Green Film Festival Kraków og gagnrýnendaverðlaun á Hof International Film Days. Hún hefur verið sýnd á yfir 30 kvikmyndahátíðum víðs vegar um heiminn.

Æviágrip – Joshua Jádi:
Joshua Jádi er handritshöfundur og leikstjóri. Hann hefur tekið þátt í alþjóðlegum þróunarverkefnum á borð við Berlinale Talents, Torino ScriptLab, Sarajevo Talents, RIFF Talent Lab og Locarno Academy Summer School. Hann hefur verið meðlimur Evrópsku kvikmyndaakademíunnar frá árinu 2025.

Verkaskrá – Joshua Jádi:
Who Is Afraid of God – fyrsta kvikmyndahandrit hans í fullri lengd, leikstýrt af Rosu Friedrich. Tökur hefjast haustið 2026

Goods — Hilke Rönnfeldt

Efniságrip:
Um borð í rannsóknarskipi á Norður-Atlantshafi mætast vísindamaður og skipstjóri. Annar kafar djúpt í hafsbotninn, staðráðinn í að draga fram öll leyndarmál heimsins, á meðan hinn siglir með öflum náttúrunnar og veit að hún er óútreiknanleg. Þetta hefði getað orðið ástarsaga.

Yfirlýsing:
Áður en Hilke Rönnfeldt gerðist kvikmyndagerðarkona starfaði hún sem skipstjórnarmaður á hafi úti, þar sem hún fylgdist með fyrstu tilraunum til djúpsjávarnámavinnslu og þeirri von að þar væri að finna lausn á orkukrísu framtíðarinnar. Er þetta enn eitt dæmið um stöðuga þrá okkar eftir meiru – og stangast hún á við þörf okkar fyrir hvíld, frið og ást?

Myndin segir sögu um ómöguleg tengsl við náttúruna og annað fólk þegar það eina sem maður hefur lært er að neyta. Hún sækir í goðsagnakennda frásagnarhefð Íslendingasagna og ber um leið tegundareinkenni spennumynda, en gefur hafinu jafnframt eigið sjónarhorn með djörfu og áþreifanlegu myndmáli.

Æviágrip:
Hilke Rönnfeldt er handritshöfundur og leikstjóri sem starfar jafnt á Íslandi, Danmörku og Norður-Þýskalandi. Hún hefur tekið þátt í þróunarverkefnum á borð við Torino Script Lab, LIM – Less Is More, Berlinale Talents og Oxbelly Episodic Lab og var valin til þátttöku í Future Frames á vegum European Film Promotion. Hún starfaði áður sem dagskrárfulltrúi hjá RIFF og er nú ráðgjafi fyrir Stockfish Film Festival og dreifingarfyrirtækið NORRA.

Verkaskrá:
A Study of Empathy (stuttmynd) – hlaut Golden Leopard-verðlaunin á Locarno-kvikmyndahátíðinni og var forvalin til Óskarsverðlauna, Evrópsku kvikmyndaverðlaunanna og dönsku kvikmyndaverðlaunanna.

Unanchored (5 x 25 mín. sjónvarpsþáttaröð, handritshöfundur/leikstjóri) – hlaut Grimme-verðlaunin fyrir sjónvarpsskáldskap.

Holes to Hell — Trygvi Danielsen

Efniságrip:
Teitur er faðir sem starfar á hjúkrunarheimili og skuldar röngu fólki háar fjárhæðir. Í örvæntingu tekur hann að sér að smygla nýju og dularfullu fíkniefni sem hefur ótrúleg áhrif – en fljótlega dregst hann inn í átök milli voldugra afla víðs vegar að úr heiminum sem nota Færeyjar sem tilraunasvæði fyrir framtíðina.

Yfirlýsing:
Sagan speglar uppgang skipulagðrar glæpastarfsemi í Færeyjum og landfræðilega togstreitu 2020-áranna í einangruðu samfélagi sem gæti orðið hernaðarlega mikilvægt svæði á óvissutímum. Um leið er þetta saga um eftirsjá og samviskubit þar sem huldufólkið úr þjóðtrúnni er birtingarmynd samviskunnar sem plagar Teit og reynir að hreinsa hann andlega þar til hann neyðist til að horfast í augu við eigið sálarlíf.

Töfrandi eiginleikar fíkniefnisins í sögunni tengjast einnig uppgangi gervigreindar og spurningum um andlega uppljómun.

Æviágrip:
Trygvi Danielsen er 35 ára færeyskur rithöfundur, leikstjóri og framleiðandi. Hann hefur gert fjölda stuttmynda, tónlistarmyndbanda og tónlistarmynda auk einnar kvikmyndar í fullri lengd, 111 góðir dagar (2021), sem var frumsýnd á Stockfish Film Festival í Reykjavík.

Trygvi er einnig tónlistarmaður og rithöfundur, hefur gefið út 10 hljómplötur og 4 bækur og er með tvær BA-gráður auk meistaragráðu í skapandi skrifum og bókmenntum frá Fróðskaparsetri Færeyja.

Verkaskrá:
111 góðir dagar / 111 Good Days (2021) – fyrsta kvikmynd hans í fullri lengd; frumsýnd á Stockfish Film Festival í Reykjavík og sýnd í Bíó Paradís árið 2022.

Pearl of the North — Pétur Óskar

Efniságrip:
Pétur snýr aftur til eyjunnar sem hann eyddi árum í að reyna að flýja. Móðir hans þarfnast umönnunar og faðir hans stendur við hlið hennar á þann eina hátt sem hann kann. Í þorpinu búa aðeins 164 manns við eina götu, en breytingarnar eru þegar hafnar: norskir fjárfestar eru farnir að kaupa upp eyjuna með það fyrir augum að selja hana í sundur, bita fyrir bita. 

Yfirlýsing:
Þessi mynd sprettur úr mínu eigin lífi og tengslum mínum við Ísland. Eftir að hafa búið erlendis í mörg ár fékk ég þá fjarlægð sem þurfti til að sjá það sem þeir sem eftir sitja taka ekki lengur eftir: land sem er smám saman að selja sjálft sig – ekki aðeins landið sitt, heldur einnig hluta af sjálfsmynd sinni.

Hver manneskja ber þrjú andlit: eitt sem hún sýnir heiminum, eitt sem hún sýnir þeim sem hún elskar og eitt sem enginn fær nokkru sinni að sjá. Talan þrjú liggur eins og hjartsláttur um myndina, innblásin af norrænni goðafræði og hugmyndinni um samsöru.

Æviágrip:
Pétur Óskar Sigurðsson er íslenskur leikari, tónlistarmaður og handritshöfundur, fæddur í Lúxemborg árið 1984. Hann nam við Cours Florent í París og hjá Thomas Ostermeier og Falk Richter við Schaubühne í Berlín og hefur starfað á sviði kvikmynda, sjónvarps og leikhúss á fimm tungumálum.

Perla Norðursins er fyrsta kvikmyndahandrit hans í fullri lengd og byggir á eigin reynslu og djúpum tengslum hans við Ísland.

Verkaskrá:
Sem leikari hefur Pétur komið fram í meðal annars And Breathe Normally (frumsýnd á Sundance 2018), Capitani (Netflix, Lúxemborg), annarri þáttaröð Ófærðar, Tatort, Das Traumschiff og væntanlegri kvikmynd Gríms Hákonarsonar, 200 Kópavogur. Sem tónlistarmaður undir listamannsnafninu Oscar Leone hefur hann tvívegis verið tilnefndur til Íslensku tónlistarverðlaunanna.

Sokli (vinnuheiti) – Elina Talvensaari

Efniságrip:
Áform eru uppi um að opna námu á ósnortnu svæði í lítt þekktum hluta finnsku Lapplands. Náman myndi ekki aðeins raska náttúrunni heldur einnig rjúfa tengsl hóps eldri kvenna á svæðinu við land forfeðra sinna. Sokli er ljóðræn heimildarmynd um merkingu staða, ósagða sögu, hljóðlát tengsl og það sem býr undir yfirborðinu.

Yfirlýsing:
Elina Talvensaari kynntist fyrst andstæðingum Sokli-námunnar á þurrkjötsmarkaði í Savukoski. Þar voru flestar konurnar heimakonur yfir sextugu sem höfðu hengt handplastaðar blaðaúrklippur um námuna upp í rjáfur í Náttúrumiðstöðinni. Andstaða við námuvinnslu er gjarnan rökstudd með umhverfisvernd, en myndin spyr hvers vegna vernd náttúrunnar þurfi fyrst og fremst að byggjast á hugmyndum um líffræðilega fjölbreytni fremur en gildi hennar fyrir fólkið sem býr á svæðinu.

Höfundurinn á sjálf flókið samband við svæðið. Hún telur sig bera ábyrgð á að skilja afleiðingar námuvinnslunnar, jafnvel þótt hún upplifi ekki sömu tengingu við landið og heimafólkið. Sú fjarlægð verður hluti af aðferð myndarinnar. Tökur munu hefjast áður en framkvæmdir hefjast svo myndavélin geti fylgst með atburðunum um leið og þeir eiga sér stað.

Æviágrip – Elina Talvensaari:
Elina Talvensaari er finnskur heimildamyndaleikstjóri sem er þekkt fyrir persónulegar og sjónrænt nákvæmar myndir um minni, staði og kyrrlát augnablik hversdagsins. Verk hennar hafa meðal annars verið frumsýnd á kvikmyndahátíðunum í Feneyjum og á IDFA. Fyrsta heimildarmynd hennar í fullri lengd, Lady Time (2019), hlaut mikið lof og Jussi-verðlaunin sem besta heimildarmynd ársins 2021. Hún starfar með Aamu Film Company og klipparanum Okku Nuutilainen, sem hefur verið hennar helsti samstarfsmaður um árabil.

Verkaskrá – Elina Talvensaari:
Lady Time (2019) – frumsýnd á IDFA, opnunarmynd Nordisk Panorama 2020; Jussi-verðlaun fyrir bestu heimildarmynd og sérstök dómnefndarverðlaun á Thessaloniki International Film Festival.

How to Please (2023) – frumsýnd á IDFA; Risto Jarva-verðlaunin á Tampere Film Festival og Jussi-verðlaun fyrir bestu stuttmynd.

Purity and Danger (2016).

How to Pick Berries (2010) – frumsýnd á kvikmyndahátíðinni í Feneyjum; Grand Prix-verðlaun á Uppsala Short Film Festival 2011 og Tromsø Palm-verðlaunin 2011.

The Ship That Wasn’t There — Claus Pilehave

Efniságrip:
Inuk leitar nýrra upplýsinga um skip sem sökk með dularfullum hætti eftir að hafa lagt af stað frá æskustöðvum hans, bænum Qaqortoq á Suður-Grænlandi. Eftir því sem rannsókn hans vindur fram kemur í ljós að þekking Grænlendinga á staðbundnum aðstæðum á norðurslóðum hefur aldrei verið hluti af opinberri frásögn slyssins. Leitin leiðir jafnframt í ljós hvernig þekking Inúíta getur varpað nýju ljósi á þessa langlífu ráðgátu.

Yfirlýsing:
Fyrir meðleikstjórann Inuk Jørgensen var skipbrot M/S Hans Hedtoft hluti af uppvextinum í Qaqortoq, síðustu höfn skipsins áður en það fórst í janúar 1959. Harmleikurinn hafði ekki aðeins í för með sér manntjón heldur markaði hann einnig tímamót í þróun Grænlands, meðal annars í ískönnun, samgöngum og uppbyggingu flugvalla, á umbreytingatíma í sögu landsins.

Sagan hefur verið sögð margsinnis í bókum, greinum og sjónvarpsþáttum, en nær alltaf frá dönsku sjónarhorni þar sem tæknilegir þættir skipsins eru í forgrunni. Myndin leitast við að varpa ljósi á grænlenskt sjónarhorn með áherslu á landslagið, hljóðheim þess og þekkingu Inúíta á náttúrunni. Að lokum er þetta saga um missi, söknuð, von og sátt – og um náttúruöfl sem móta lífið á svæðinu enn þann dag í dag. (eftir meðleikstjóra Inuk Jørgensen).

Æviágrip – Claus Pilehave:
Claus Pilehave er menntaður blaðamaður með aðsetur í Kaupmannahöfn. Hann hefur skrifað handrit að og leikstýrt fjölda sjónvarpsheimildarmynda, meðal annars Greenland’s White Gold, sem hann gerði ásamt grænlenska leikstjóranum Otto Rosing. Hann vinnur nú að þessari heimildarmynd um samband Grænlands og Danmerkur ásamt meðleikstjóranum Inuk Jørgensen. Árið 2022 lauk hann sumarnámskeiði í handritaskrifum við European Film College.

Verkaskrá – Claus Pilehave:
Greenland’s White Gold (55 mín. heimildarmynd) – meðleikstjóri ásamt Otto Rosing.

Hægt er að lesa meira um Handritasmiðju-Norðurslóða hér.